يوميات في المدرسة

السلام عليكم ورحمه الله وبركاته
كيف حالكم ..؟
يالله إن تحييهم عندي لكم مويضيعن صغير ان شاء الله يعجبكم
وهو يوميات في المدرسه

نبي نبدا بالسالفه سلمكم الله اول ماقالو بكره الدراسه وانا من الفرحه ماقدرت انام >>> مادرى انها غثى
واحتري الصبح لين يطلع عشان المدرسه ويوم جاء الصبح ويجي ابوي يقوم اخواني يالله المدرسه وماتشوف الا الغمص في العيون وانا رازن خشتي احتري الروحه للمدرسه وبسم الله ركبنا السياراه وماتشوف السياراه الا مطيحه >>> بلى والله من صغر الراس
ومن قدي مبسوط ووقفنا عند باب المدرسه وجاء الفراش(الحارس) جزاه الله خير وعاوني على شيلت راسي من الفرحه
ويوم حطيت رجلي على باب المدرسه ولا قدرت امشي ونفخت الراس تبخرت ابي امشي عجزت من الخوف
ومادريت الى الي تالني من اذاني ومدخلني غصب واجلس مع المبزره << اخس يالكبير
وعصير جاي وحلاو رايح وعلى هالحال اسبوع وخويكم يحسب الدراسه تسذا ويجي الاسبوع الي عقبه واه ياليته ماجى واول حصه يدخل علينا مدرس الرياضه ويقول اسمعوا ترى الحصه الجايه بسمعلكم حروف الهجاء من الف الى الصاد خلاص وخويكم انواع التسليك خلاص ومن القراده الحصه الجاييه بكره الي هو يوم الاحد والي يغبنك اكثر مدرس القراءه ما بعد عطانا شي وياشين الي يدخل عمره في شي مايخصه
المهم نعود لموضوعنا ويدخل علينا ويقول من الي ماحفظ ولا الطلاب مايدرون وش يبي منهم وابو الشباب بدا يسمع والي ماحفظ يطلعه على السبوره
لو تلاحظون في الصوره اننا مبسوطين ماندري وش السالفه

وخويكم مع الطالعين ولين الحين ماادري ليش مطلعني ويوم خلص تسميع ويجنا اللي ماحفظنا ويطق الاول والثاني لين جاني الدور
ويقول افتح يدك
قلت ليش
قالي اقولك افتح يدك
طيب وش سويت
تفهم افتح يدك
طيب ليش
ومادريت الا ماحطني بالخيزرانه على كتفي والله لايوريكم لاشعوريا ً فتحت يدي وخذ تمحيط ويطفني ست
ولا اخوي يطل من برى الفصل ويضحك
ورنت الحصه وطلعنا فسحه واروح لاخوي وقالي طقك مدرس الرياضه
ولاني توني اذكر انه طاقني وخريتها بتسوه <<< استيعابه بطيء
ومن عقبها كرهني في المدرسه
ومن حب الى كره
وكبرنا شوي وصرنا في الصف الثالث الابتدائي وصراحه هذي السنه فيها من الهبال و سعت الصدر الشي الكثير الي الي يعجز عنها اللسان والتعبير <<< بلا فلسفه عطنا الزبده
ولا واحدن عندنا اسمه حمد ويلقب بحمد المصرقع هذاك الانسان ماقد شفت مثله بالهبال الرجال من كثر ماهو منسم بغينا نفتحله بنشر في الزاويه الرجال لاحق على العصور كلها اجيال تروح واجيال تجي والرجال ثابت ماتغير
اول مادخلت الفصل دخل عقبي المدرس وقعد يتفلسف عن الماده وانها صعبه وشدوا حيلكم ومن هالكلام
ويقوم حمد ويقول يابن الحلال لا صبعه ولاشي انت كل سنه تقول هالكلام ولا شفنا شي ويقول المدرس انت لين الحين فيه مانجحت انت يبي من يرسبك
حمد : اتحادك اتحادك
قلت على هالتحدي يبي يجيب 7 او 6 من 8 كان ذاك الوقت الامتحانات من8
ويجي المدرس ويقول الدرجات ويجي اسمه حمد درجتك واحد
قلت كل هذا التحدي والهياط يالله واحد مار يقول حمد يعني احجز مقعدي لسنه الجايه
ونرجع لمدرس الرياضه هذا المدرس كان فيه حركه شينه الي هي انه يجلس ولده جنبه ويخلي ولده يختار أي طالب ويناديه ويرص على رقبته عشان يعلم اسامي اخواته
ومن قرادة المدرس وولده اختار حمد وناداه حمد حمد تعال ويجيك حمد يدربي دميجته
ويمسك المدرس رقبته
المدرس : وش اسم امك
حمد: ليش
المدرس : اقولك وش اسم امك
حمد : مانيب معلمك
المدرس : يرص على الرقبه زود ويقوله وش اسم امك
حمد : خلاص خلاص اسمها نوره
المدرس : وش اسم اختك
حمد: خلاص علمتك اسم امي يكفي
المدرس : اقول وش اسم اختك
حمد : خلاص اسمها منيره
المدرس واختك الثانيه وش اسمها
حمد : ماعندي
المدرس الى عندك
حمد : طيب حصه
ويفكه ويوم فكه قاله العب عليك وخذ نحشه
والمدرس وراه تتوقعون وين راح ؟
فوق المظله
المدرس : يذب عليه النعال وانتم كرامه حول حول قبل لايجي المدير
حمد: منيب محول لين تروح اخر المظله
ومانزل لين راح
المهم ذاك اليوم وانا بدخل الفصل الا واسمع واحد يغني ويطرب واركز في الصوت الا عزازي الفصل يغني حمد وادخل الا وحاط رجل على رجل وجايب علبه مويه بخمسه ريال وعافطها وجايب مغاط الطماط الكبير شوي ولافها على العلبه ومخليها تسنه عود يوميات في المدرسة Musik010

وخذ طرب والي عنده يصفقوله تسنك في جلسه خالد عبد الرحمن
ودخل المدرس ولاه مريض فيه لحسه شوي كل الطلاب مزاعق ومايعرف بسكتهم الى اذا طلع اثنين برى الفصل ويطلعني انا وحمد برى الفصل
وقال حمد تتحداني ادخل والمدرس مايدري قلتله اتحداك قال طيب ويفتح الباب شوي ويشوف المدرس يكتب في الدفتر ويزرق ويروح لكرسيه قلت اكيد بيسوي نفسه نايم
عشان مايشوفه المدرس واسمع صوت ضحك واطل والقاه حمد ويلتفت عليه المدرس ونسى انه طلعه
حمد قم اطلع ويطلع ويقولي هاه دخلت ولا

واخلص ثالث ورابع والقاه على زاويته ماتغير
ونكبر شوي
ونكون في آخر سنه الي هي سادس ابتدائي
ووخر عني من قدي ادرس ماده الخط
وياليتني مادرستها هذي الماده
هم وغم ومدرسها
كل يوم والثاني موقفني عشاني ناسي الكتاب
تعقدت من االدراسه والسبه هو<<< بسم الله عليك
وصرت لا مبالي لا اهتم من الدراسه ولا من المدرسه
حتى وقعت الفاجعه وهي نهايه السنه الا وهي
الدويره الحمرا (رسوب)
وكنت اشوف الناس مبسوطين في العطله وانا في الغرفه اذاكر
فحزنت حزناا وبكيت بكاءا يوميات في المدرسة Cry

<< متاثر بالافلام المصريه
وتذكرت هذا المثل من جد وجد ومن زرع حصد .......
وهذي نهايه كل مستهتر .......
واتمنى ان ينال الموضوع على اعجابكم مضحك